Русинот Алекс Буркан го создаде првиот функционален светлосен меч кој може да пресече и челик. Неговиот изум влезе во Гинисовата книга на светски рекорди, а е инспириран од оружјето на џедај витезите од популарните „Star Wars“ филмови.
Буркан е човекот кој стои зад првата светлосна сабја во светот чија острица може да се вовлекува. За себе вели дека е голем обожавател на „Star Wars“ и дека мечот од филмот е негов „најмил гаџет“.
Мечот е патентиран, а произведува плазма острица долга повеќе од еден метар и достига температура која надминува 2.800 степени Целзиусови. Многу лесно може да пресече челик, пишува CNN.
Во 2013 година Буркан проучувал опрема за производство на гас водород што му ја дало идејата за светлосен меч. Минал години собирајќи идеи заедно со резервни делови од интернет и од депонии. Клуч за светлосниот меч е електролизаторот, кој ја дели водата на гасови на водород и кислород, процес кој успеал да го прилагоди по многу рунди тестирање за да оформи облик и должина потребни за неговата светлосна сабја,
„Конечно, најголем предизвик беше да се стисне целиот систем за дистрибуција на гас во дршката на светлосниот меч“, вели Буркан.
Кога успеал во тоа, оружјето од популарниот филм станало реалност. Засега работи само 30 секунди при полна сила, но Буркан се надева дека ќе продолжи со надградба и замена на резервоарот.
„Мислам дека науката ќе помогне и конечно ќе може да се приближиме на светлосен меч од филмската верзија“, вели Буркан.