Рускиот новинар Јури Дуд мора да плати 120.000 рубли (малку повеќе од 2.000 евра) казна бидејќи „пропагирал хомосексуални врски“, одлучи московски суд.
Окружниот суд во Лефортово соопшти дека 35-годишниот маж е казнет поради „пропагирање нетрадиционални сексуални односи меѓу малолетници“.
Дуд (35), поранешен спортски новинар, е меѓу најголемите руски медиумски ѕвезди, а се прослави преку острите, политички обоени интервјуа и документарни филмови објавени наYouTube, каде има повеќе од 10 милиони претплатници. Дуд беше казнет со 100.000 рубљи минатиот октомври под обвинение за „пропаганда на дрога“, откако про-Кремљ лоби група побара од руското Министерство за внатрешни работи да го истражи.
Прогласен за странски агент
На 15 април, руското Министерство за правда го прогласи за странски агент, откако јавно се спротивстави на руската војна во Украина, опишувајќи ја како „империјална хистерија“. Адвокатот за човекови права Павел Чиков рече дека случајот против Дуд е заснован на неговото интервју со геј уметник од 2021 година на YouTube, иако Чиков истакна дека интервјуто не се однесува на хомосексуалноста.
Во 2013 година, Русија го криминализираше „промовирањето на нетрадиционалната сексуална ориентација на децата“, дел од пошироката конзервативна агенда на Кремљ. Претседателот на парламентот Вјачеслав Володин минатата недела повика на целосна забрана за промоција на „нетрадиционалните вредности“ во Русија.