Група сопруги и мајки на руски војници го повикаа претседателот Владимир Путин да престане да ги праќа нивните сопрузи и синови „на колење“, принудувајќи ги да им се придружат на јуришните единици без соодветна обука или залихи.
Снимката беше објавена на независниот руски Telegram канал SOTA.
Жените во видеото велат дека нивните најблиски биле „принудени да им се придружат на јуришните единици“ на почетокот на март и покрај тоа што имале само четири дена обука откако биле мобилизирани. Две жени заедно држат знак на руски, пишува CNN.
„Нашите мобилизирани (мажи) се испраќаат како јагниња на колење да ги нападнат утврдените области - пет по пет, против 100 непријателски војници вооружени до заби. Тие се подготвени да ѝ служат на татковината, но според специјализацијата за која беа обучени, не како јуришни војници. Ве молиме да ги повлечете нашите момци од борбените линии и да им дадете на топчиите топови и муниција“, вели една од жените.
CNN не можеше самостојно да ги потврди тврдењата на групата жени на видеото. Испраќањето на стотици илјади граѓани од Русија да се борат на боиштата во Украина, предизвика несогласување и протести и поттикна многу Руси, особено млади мажи, да ја напуштат земјата.
„Побегнавме од Русија затоа што сакаме да живееме. Се плашиме дека може да нè испратат во Украина“, изјави претходно за CNN еден маж, кој побара анонимност за да ги заштити најблиските кои останале таму.
Семејствата на руските регрути ја критикуваа мобилизацијата, велејќи дека таа е заглавена во проблеми како што се недостаток на раководство од офицери од среден ранг, непостоечка обука, проблеми со дисциплината, како и логистички тешкотии како што се недоволна униформа, лоша храна и недостаток на медицински материјали.
