Популарниот турски готвач Нусрет Ѓокче изјави дека никогаш повеќе нема да се симне на терен на Светско првенство откако претрпе лавина негативни критики за фотографиите со Меси и пехарот на ФИФА.
На финалето во Катар репрезентацијата на Аргентина ја победи Франција, а многумина го чекаа моментот кога Лионел Меси требаше да го подигне пехарот од 18-каратно злато, чија вредност се проценува на околу 20 милиони американски долари.
Долу на теренот во Доха тогаш се најде и популарниот готвач, кој во рацете го држеше токму тој пехар. На многумиона не им се допадна тоа, бидејќи пехарот смеат да го допрат само оние што го освоиле Светското првенство на ФИФА, како и актуелни шефови на држави. Колку и е да е голема неговата популарност, за ФИФА Salt Bae спаѓа во „обичниот“ народ и тој не смее да го допира пехарот.
Говорејќи во интервју за The Times, Нусрет објасни дека на теренот се чувствувал како дома, поради фактот што има живеено во Аргентина и што многу играчи го посетувале ресторанот каде работел. Од 2007 до 2010 година работеше во неколку локални ресторани во Аргентина и САД, без да биде платен, со цел да собере искуство како шеф.
„Не можам да направам ништо во врска со тоа што бев таму, но никогаш повеќе не би стапнал на терен на кој се одржува Светско првенство. Не се симнав на теренот за да се рекламирам, само ја почувствував таа потреба да бидам таму“, објасни Нусрет.
„Имаше уште најмалку илјада луѓе на теренот, но кога се покажуваат видеа се гледа како да сум бил само јас. Не сакав никого да засенам. Не ми се допаѓаше публицитетот“, порача тој.
Откако се појави долу на теренот на финалето во Доха, популарниот Salt Bae секојдневно добиваше негативни критики од јавноста, која оттогаш внимателно ги следи неговите постапки.
Нусрет Ѓокче иако е од Турција, е етнички Курд од селото Пашали во провинцијата Ерзурум.
