Консултантската компанија Deloitte спроведе големо истражување прашувајќи ги германските возачи кој автомобил би го претпочитале доколку одлучат да купат ново возило.
Според оваа анкета, следниот пат кога ќе изберат автомобил, само 15% од нив ќе се одлучат за електричен, додека 40% од германските возачи би се одлучиле да купат хибридно возило - односно комбинација од електричен и бензински мотор.
Повеќето од оние кои се за префрлање на електрични возила, како причина за ваквата одлука ги наведуваат високите цени на горивата. Меѓутоа, доколку полнењето на електрична енергија би било скапо како фосилното гориво, 41 отсто од нив би ја преиспитале својата одлука да купат автомобил на струја.
Недоволната автономија во возењето е најголемата пречка за купување EV
Една четвртина од анкетираните возачи наведоа мал радиус на движење како најголема грижа за електричната мобилност, проследена со инфраструктура за полнење (14 проценти) и повисоки трошоци за набавка (12 проценти).
Речиси една третина од 1.500 испитаници рекле дека ќе потрошат до 2.000 евра повеќе за електричен автомобил во споредба со соодветно возило што работи на фосилни горива.
Во просек, тие наведоа автономија на електричниот автомобил од 616 километри како пресудна за да почнат да размислуваат да купат електрично возило (EV).
