Ништо ново нема да откриеме ако напишеме дека Никола Јокиќ е незапирлив, а својата трипл-дабл доминација ја продолжи и синоќа.
Во мечот против Шарлот Хорнетс, српскиот центар ги предводеше Денвер Нагетс до победа од 119:105, а патем постави и нов рекорд за франшизата од Колорадо.
Тој имаше трипл-дабл учинок од 30 поени, 16 скока и 10 асистенции, 20-ти пат оваа сезона.
Со тоа го надмина сопствениот рекорд од минатата сезона кога по 19-ти пат забележа трипл-дабл и ова е, според тоа, нов рекорд во историјата на Денвер Нагетс.
Интересно е што на секој од тие 20 натпревари кога Јокиќ имал ваков учинок, Денвер славел победа.
Што се однесува до самата игра, Демвер почна лошо бидејќи во ростерот за оваа средба ги немаше Џамал Мареј и Арон Гордон.
Лошиот старт резултираше со минус од 16 поени веќе во првата четвртина.
Сепак, во втората, предноста на домашните почна да се топи и до полувремето изнесуваше само три поени разлика.
Потоа во третата играа Јокиќ и Мајкл Портер Јуниор, а Нагетс пред последните 12 минути отидоа на двоцифрена разлика и не ја испуштија повторно.
Тимот ја прекина серијата од четири порази на гости и го задржа првото место во Западната конференција.
Покрај учинокот на Јокиќ, Колдвел-Поуп имаше 15 поени во тимот на Денвер, Браун и Портер додадоа по 14, додека Влатко Цанчар постигна 12.
Во тимот на Шарлот најистакнат беше Вашингтон со 22, а Хејворд имаше еден помалку.
Бруклин - Филаделфија 98:101
Шарлот - Денвер 105:119
Орландо - Мајами 103:107
Вашингтон - Индијана 127:113
Атланта - Сан Антонио 125:106
Њујорк - Јута 126:120
Кливленд - Чикаго 97:89
Голден Стејт - ЛА Лејкерс 103:109
Сакраменто - Далас 133:128