Има многу, многу сцени од популарната серија „Friends“ на кои секогаш ќе се сеќаваме, а танцот на Моника и Рос на лажната Нова година дефинитивно е една од нив.
Публиката неодамна имаше можност повторно да се дружи со омилените „Пријатели“ во специјалното шоу на HBO, а Кортни Кокс подоцна реши да ја почести јавноста со реизведба на култниот танц што го одигра пред скоро 20 години со нејзиниот филмски брат, Рос Гелер, кого го играше Дејвид Швимер во серијата.
Кокс за танцов партнер овојпат го имаше поп-пејачот Ед Ширан, а снимката од настапот ја споделија на своите профили на Instagram.
Култниот танц е од десеттата епизода од шестата сезона на „Friends“, емитувана на 16 декември 1999 година. Во таа епизода, Рос и Моника со нетрпение сакаат да настапат пред камерата на забавата за Нова Година на Дик Кларк, убедени дека ќе успеат да ја „оживеат“ нивната кореографија смислена во детството. Епизодата се вика „The One With The Routine“ токму поради таа сцена.
