Не само што батериите треба да бидат безбедни, туку очекуваме и да бидат поиздржливи, заменливи, повеќекратно употребливи и да можат полесно и почесто да се рециклираат.
Европскиот парламент на почетокот на март усвои извештај дека батериите на уредите во иднина треба да бидат поодржливи, да можат да се поправаат и менуваат, но и информациите за нивното времетраење да бидат подостапни за клиентите.
Сега се очекуваат реакции од земјите-членки на кои претходно им беше кажано како треба да се прилагодат на новите правила и како одржливите батерии треба да станат стандард во иднина.
Како што објасни Моник Гојан, генерален директор на Европската асоцијација на потрошувачи, имајќи предвид дека батериите напојуваат многу уреди, од компјутери и паметни телефони до велосипеди и електрични автомобили, промената во регулативата била очекувана.
„Батериите не само што треба да бидат безбедни, туку и очекуваме да бидат поиздржливи, заменливи, повеќекратно употребливи и да можат полесно и почесто да се рециклираат. Потрошувачите постојано се жалат дека, особено на паметните телефони, батериите се расипуваат, така што нивниот дизајн во иднина треба да им ги обезбеди сите услови за да не трошат пари непотребно“, објасни Гојан.
Батериите кои не се интегрирани во уредите, но можат да се поправат и заменат, се клучни за продолжување на животниот век на потрошувачката електроника, како и на електричните возила.
Од друга страна, батериите кои тешко се менуваат лесно ги ставаат потрошувачите во ситуација да го фрлат уредот и да купат нов, што предизвикува голема штета на буџетот на корисникот, но и еколошка штета поради зголемените количини на електронски отпад и неговото неодговорното одлагање или неможноста електронскиот отпад соодветно да се регулира.
Практично, гледајќи ги старите правила од пред неколку години и новото, кое го усвои Европскиот парламент со споменатиот извештај, се враќаме неколку години назад во минатото кога мобилните уреди имаа лесно заменливи батерии и кога уредите траеја подолго, бидејќи клиентите можеа да ги поправат.
Некои производители веќе почнаа да се враќаат на заменливите батерии, па така Nokia C2 Second Edition и Nokia C21 Plus имаат заменливи батерии. Исто така, Nokia C21 Plus дури ќе ви овозможи да го изберете капацитетот на батеријата, 4.000 или 5.000 mAh, која ќе може да се смести во куќиштето на телефонот. Клиентите на тој начин ќе можат директно не само да ја заменат батеријата, туку и да влијаат на нејзината автономија, т.е. времетраење.
Дел од овој извештај е и неодамнешната одлука во цела ЕУ да се користи ист полнач за сите уреди, вклучувајќи мобилни телефони, слушалки, таблети, мобилни конзоли, камери и преносни звучници. Тоа би требало да биде USB Type-C полнач, кој Apple одбива да го прифати, бидејќи, како што вели американската компанија, ќе ја „убие иновативноста“.
Оваа одлука предвидува во иднина уредите да не мора да се продаваат со полнач и потрошувачите да ги купуваат посебно, доколку им требаат, туку еден полнач да одговара на сите уреди.