Освен што смртта на Силвио Берлускони е вест сама по себе, медиумите во Италија веќе почнаа да пишуваат кој ќе го наследи богатството на италијанскиот политичар.
Според La Repubblica, наследството на Берлускони треба да се подели меѓу неговите деца Марина, Пјер Силвио, Барбара, Елеонора и Луиџи.
Првиот состанок на кој ќе се разговара за наследството е закажан за крајот на јуни кога Fininvest, италијанскиот холдинг во сопственост на Берлускони, ќе одржи состанок и ќе назначи нов одбор на директори кој ќе остане на функцијата само една година.
„Состанокот на Fininvestќе биде прв по смртта на Берлускони, кој никогаш не се откажа од апсолутното мнозинство во сопственоста. Неговите деца Марина и Пјер Силвио поседуваат по 7,65 отсто од Fininvest. Од друга страна, Барбара, Елеонора и Луиџи, децата на Берлускони од неговиот брак со Вероника, делат 21,42 отсто од акциите на семејната канцеларија H14 задолжена за инвестиции“, пишува La Repubblica.
Според медиумите, доколку акциите едноставно се поделат меѓу петте деца, трите од бракот со Вероника би имале апсолутно мнозинство во капиталот од 58 отсто. Така, Марина и Пјер Силвио би имале малцински удел во сопственоста.
Иако Берлускони претходно ја назначи Марина да го води Fininvest, а Пјер Силвио на челната позиција во Mediaset, италијанскиот политичар никогаш јавно не зборуваше за распределбата на акциите во компаниите.
„Овие работи му ги довери на адвокатот Микеле Карпинели и тој ќе го прочита тестаментот“, пишува италијанскиот весник.
Холдингот Fininvest е во центарот на корпоративната мрежа која има значителен удел во три компании, и тоа 53 отсто во издавачката куќа Mondadori, 48 отсто во телевизиските станици Mfe и 30 отсто во компанијата Banca Mediolanum.
Fininvest има и 100 отсто удел во фудбалскиот клуб Монца и 6,8 отсто во дигиталната услуга Soldo, како и два отсто во Satispay.
Сепак, не сè што поседува Берлускони му припаѓа на Fininvest. Берлускони освен од овој холдинг задржал и голем број компании за недвижности, а тоа особено се однесува на Идра, каде се наоѓаат некои од најпознатите семејни куќи.
„Скапоцените камења на Идра се вклучени во буџетот од 426 милиони евра. Целиот имот што Берлускони го остави на своите наследници, а се однесува на недвижен имот, се проценува на 3,7 милијарди евра“, пишува La Repubblica.
Кога станува збор за вкупната актива, Rai News пишува дека вкупната актива на Берлускони во 2022 година се проценува на 6,3 милијарди евра.
