Ал Наср се огласи по повод клаузулата според која Португалецот наводно ќе заработи огромна сума на пари за да ја промовира кандидатурата на Саудиска Арабија да биде домаќин на Светското првенство.
Откако Кристијано Роналдо беше промовиран како најголемото засилување во историјата на Ал Наср, не престануваат шпекулациите за неговиот договор и дополнителните мултимилионски клаузули. Роналдо за една година во Саудиска Арабија ќе заработи 200 милиони евра, но нема ставка за удвојување на парите во договорот.
Според деталите кои ги објавија некои светски медиуми, Кристијано треба да заработи дополнителни 200 милиони евра промовирајќи ја кандидатурата на Саудиска Арабија за домаќин на Светското првенство во 2030 година, но челниците на овој клуб излегоа со соопштение во кое го демантираат постоењето на таква клаузула.
„Ал Наср сака да разјасни дека, спротивно на објавеното, договорот на Кристијано Роналдо не подразбира обврска за поддршка на каква било кандидатура за Мундијалот“, објавија од саудискиот клуб.
Иако Роналдо сè уште не дебитирал за Ал Наср, популарноста на овој клуб расте со неверојатна брзина, па дури се бараат билети за тренинзи. Се очекува Кристијано да дебитира на 19 јануари на пријателскиот натпревар против ПСЖ.