Голманот на „Старата дама“ уверува дека со звучните летни засилувања тимот претстојнава сезона ќе биде во конкуренција за Скудетото.
Јувентус освои 9 последователни титули во Серија А од 2012 до 2020 година, но во последните две сезони завршуваше на 4. место, едвај изборувајќи пласман во Лигата на шампионите, додека титулите заминуваа во Милано, прво кај Интер, а потоа и кај Милан.
Зимското засилување во голгетерот Душан Влаховиќ, кој дојде од Фиорентина, надополнето со летните Анхел Ди Марија, Пол Погба и Глеисон Бремер му го дадоа на тимот квалитетот кој се чини му недостасуваше за да биде конкурентен за Скудетото.
„Ди Марија и Погба инспирираат самодоверба кај остантите од тимот. Анхел, Пол и Бремер не дојдоа во Јуве за да завршат на 4. место, тие сакаат трофеи. По изминатата сезона, која не може да се оцени како позитивна, наша должност е да се обидеме да ја освоиме титулата“, изјави полскиот голман Војчех Шченсни говорејќи за Gazzetta dello Sport, весникот со розеви страници.
Минатата сезона Јуве остана и без трофеите во Суперкупот и во Копа Италија, што е прва сезона по 2010/2011 во која клубот не освоил ниту еден трофеј.