Поранешниот селектор на Украина е дефинитивниот избор од страна на новите сопственици на Џеноа и во текот на нареднава недела ќе биде официјализиран неговиот ангажман.
Компанијата 777 Partners од Мајами, која е новиот сопственик на Џеноа, ќе му врачи отказ на Давиде Балардини откако и на синоќешниот натпревар неговиот тим не успеа да победи, овој пат играјќи 2:2 на гости кај Емполи на отворањето на 12. коло од Серија А. Џеноа се спаси од пораз со гол на минута до крајот. Нашиот Горан Пандев преседа на клупата.
Балардини сѐ уште нема добиено отказ, но La Gazzetta dello Sport тврди дека тоа е готова работа бидејќи Андриј Шевченко од понеделник ќе пристигне во Џенова за да го потпише договорот.
Токму в понеделник 777 Partners ќе го комплетира преземањето на клубот од Енрико Прециози. Според најтиражниот италијански весник, украинскиот стратег ќе потпише двегодишен договор со „Грифоните“.
Гледајчи ги досегашните резултати (1 победа, 6 нерешени и 5 порази), Џеноа и сезонава ја очекува грчевита борба за опстанок, а со новите сопственици и Шевченко на клупата се очекува тимот да исплива кон средината на табелата, но и засилен со нови фудбалери за време на зимскиот преоден рок.
Со оглед на тоа што синоќешниот натпревар беше последен за Џеноа пред репрезентативната пауза, Шевченко првиот натпревар ќе го има на 21 месецов кога Џеноа на својот „Луиџи Ферарис“ ќе ја пречека Рома на Жозе Мурињо.
Шевченко, кој од играчката кариера се пензионира во 2012 година, досега нема искуство од работа со клуб бидејќи од 2016 до ЕУРО 2020 беше селектор на Украина. Како играч остави огромен печат во Серија А откако 7 сезони го носеше дресот на Милан етаблирајќи се како еден од најдобрите голгетери во историјата на Калчото. Настапуваше уште и за киевски Динамо и Челси.
