Легендарниот украински фудбалер и освојувач на Златната топка, Андриј Шевченко, во емотивно интервју за Sky Sports зборуваше за ситуацијата во неговата земја и руската инвазија на Украина.
Шевченко, кој изминативе денови неколку пати повика на мир и единство на Украинците, синоќа дури и пушти солза пред новинарите на Sky Sports.
Некогашниот најдобриот фудбалер во светот потенцираше дека членовите на неговото семејство сѐ уште се во Украина и дека не сакаат да ја напуштат земјата, иако тој тоа го побарал од нив.
„Зборувам со моите родители и на мајка ми ѝ велам дека сакам да се вратам, но чувствувам дека сега можам оттука да помогнам зборувајќи за тоа што се случува, а тоа е вистинска трагедија со која се соочува украинскиот народ. Мојата мисија е да се обидам да ги натерам луѓето да ја разберат ситуацијата, човечката страна на ситуацијата со која се соочуваме. Се обидувам да соберам пари и да му помогнам на украинското општество преку разговори и акции“, рече Шевченко на почетокот од разговорот.
Ги повикал сестра му и мајка му да ја напуштат Украина, но тие одбиле. Шевченко тврди дека ситуацијата во Киев е катастрофална.
„Горд сум што сум Украинец. Ова се тешки моменти за мојата земја, народ и семејство. Мајка ми и сестра ми останаа во Киев и одбија да заминат. Тие остануваат да се борат за слободата и нашите души. Во овој момент земјата е обединета и еден со други си помагаат, семејствата делат храна со војниците. Ги поминуваме најтешките моменти од нашата историја, но луѓето се заедно затоа што сакаат слобода и да ги одбранат своите домови“, додаде некогаш фантастичниот украински напаѓач.
Поранешниот тренер на Џеноа и селектор на Украина вети дека ќе направи сѐ за да ѝ помогне на татковината дури и ако веднаш не се врати во својата земја.
