И покрај двата црвени картони тетовчани не престанаа да постигнуваат голови, додека Силекс откако имаше негатива на паузата во Штип успеа да направи пресврт.
Работнички ја пречека Шкендија на Националната Арена „Тодор Проески“ во Скопје и уште во 7. минута го отвори резултатот преку Методи Максимов. Гостите во 23. минута израмнија преку Аденис Шала, а само четири минути по паузата Влатко Стојановски се погрижи за комплетен пресврт.
Домашните израмнија во 66. минута откако слободниот удар на капитенот Крсте Велкоски заврши во стативата, а на одбиената топка налета Иво Јанакиевски и ја смести зад грбот на Костадин Захов. Само две минути подоцна втор жолт картон доби гостинскиот капитен Ферхан Хасани откако по втор пат се обиде да изглуми пенал. Сепак, во 73. минута Шала погоди за 2:3, а иако потоа Мевлан Мурати доби директен црвен поради спречување шанса за гол со фаул, Шкендија во 85. минута постигна нов гол преку Стојановски - за конечни 2:4.
Штипската публика виде натпревар полн со пресврти, но нивната Брегалница загуби. Силекс поведе уште во 5. минута преку Масевски, а потоа „Сините“ направија пресврт со головите на Ѓорѓиев и Ристевски во 8. и 23. минута. Манасиевски прво израмни во 64. минута, а потоа во 75-тата го постигна победничкиот гол за гостите од Кратово.
Академија Пандев и петти натпревар по ред не знае за победа, но барем ја заврши серијата од 4 последователни порази играјќи 1:1 на гости со Победа.
Македонија ЃП немаше проблеми на домашен терен против фенерџијата Скопје прокнижувајќи 3 бода со победа од 2:0.
Колото ќе се комплетира утре со натпреварот помеѓу бранителот Шкупи и лидерот Струга.
Табела:
- Струга 25
- Шкендија 19
- Силекс 18
- Тиквеш 16
- Шкупи 15
- Македонија ЃП 12
- Брегалница 12
- Работнички 11
- Академија Пандев 8
- Победа 8
- Скопје 5