Македонскиот фудбалски шампион Шкупи загуби на реваншот во Гибралтар, но со вкупни 3:2 сепак помина во наредното квалификациско коло од Лигата на шампионите.
Тимот од скопски Чаир во Гибралтар отпатува со одлична предност од 3:0, но малку фалеше сето тоа да падне во вода. Домашниот тим на Линколн Ред Импс поведе во 32. минута преку Хуанфри, а во 69. минута ветеранот Ли Кашаро, 40-годишниот репрезентативец на Гибралтар, го дуплираше водството носејќи надеж дека домашните ќе ја анулираат предноста.
Тоа не се случи, Шкупи спречи трет гол во својата мрежа, па со вкупни 3:2 патува во 2. квалификациско коло каде го чека мегдан со хрватскиот гигант Динамо од Загреб, клуб каде настапуваат двајца наши репрезентативци: Стефан Ристовски и Аријан Адеми.