Перименопауза е период кој претходи на менопаузата, а почнува неколку години порано, главно во раните четириесетти години, но може и порано. Во тој период се намалува нивото на женските полови хормони, што значи дека јајниците постепено почнуваат да произведуваат помалку естроген.
Во текот на перименопауза, менструалниот циклус на жената станува неправилен. Жените кои не раѓале, како и оние кои рано влегле во пубертет или имаат краток менструален циклус, имаат поголема веројатност да доживеат и перименопауза порано.
Перименопаузата трае до менопауза, која означува последна менструација во животот на жената и крај на нејзиниот репродуктивен период. Тогаш јајниците престануваат да произведуваат јајце-клетки. Во последните година, две од перименопаузата доаѓа до изразен пад на естрогенот и жените доживуваат симптоми на менопауза. Вообичаениот период на перименопауза трае околу 4 години, но сето тоа е индивидуално и кај некои жени оваа фаза може да трае од неколку месеци до повеќе години.
Перименопаузата завршува 12 месеци по последната менструација. Првиот сигурен знак за перименопауза се исклучително нередовните менструации, а најчести симптоми се чувствителност на дојките, влошување на ПМС, ненадејни бранови на топлина, намалена желба за секс, нередовни менструации, сувост на вагината, неконтролирано испуштање урина при напор или во текот на кивање, почеста потреба за мокрење, промени во расположението и несоница.
Важно е да се напомне дека доколку менструациите станат многу обилни, проследени со згрутчување, ако меѓу циклусите има крвавење или се скрати периодот меѓу две менструации, неопходно е за тоа да го известите гинекологот.
Перименопаузата е нормален и природен дел од животот и не постои третман за запирање на овој процес. Некои промени во начинот на живот како поздрава исхрана, лесни вежби и избегнување активности кои предизвикуваат бранови топлина секако можат да помогнат.
