Според најновите истражувања, секој од нас во просек поминува околу 7,7 часа дневно во седечка положба. Секојдневното седење има многубројни последици на телото, а неактивноста е четврта најчеста причина за предвремена смрт во светот.
Со оглед на тоа дека сѐ повеќе се зголемува бројот на седечки професии, експертите предупредуваат дека треба да се реагира уште пред да се забележат првите тегоби од долгото седење.
Целодневното седење може негативно да влијае на телото на повеќе начини, меѓу кои и следниве:
Проблеми со држењето
Седењето долги периоди може да предизвика болка во рамениците, вратот и грбот. Тоа може да предизвика и лошо држење. Колку повеќе време седите, толку поголеми се шансите дека ќе имате лошо држење. Најчесто, додека се на компјутер, луѓето ги навалуваат вратот и рамениците, со што си предизвикуваат болка.
Подгрбавеното седење на биро на почеток може да предизвикува помали болки во грбот што постепено почнуваат да се влошуваат. Лошото држење може да предизвика стегање на ‘рбетните дискови, што може да предизвика трајни проблеми.
Проблеми со дигестивниот систем
Многупати, луѓето коишто седат долги периоди јадат додека седат. Седнувањето по јадењето може да го успори варењето на храната, а спорото варење може да предизвика повеќе мали проблеми.
Проблеми со нозете
Неактивноста и зголеменото седење може да предизвика проблеми со циркулацијата, отоци, слаби коски, па дури и остеопороза. Бидете активни и одржете ја циркулацијата на крвта. За време на паузите станете и движете се.
Ако подолго време не ги испружувате или поместувате нозете, ќе почнат да ве болат мускулите. Таа болка на почеток е послаба, но со тек на време станува сѐ посилна.
Поради тоа, треба додека седите стапалата да ви бидат рамни со подот, а колената да ви бидат свиткани нешто повисоко од висината на колковите. Не седете со прекрстени нозе во колената, ни во зглобовите.
