Ако некогаш сте налетале на терминот Три Венеции, сигурно сте се запрашале што всушност значи со оглед на тоа што Венеција е една и сите знаеме која е. Ако не сте слушнале, тогаш ќе слушнете сега.
Името Три Венеции (Tre Venezie) или Тривенето (Triveneto) го означува географскиот регион составен од териториите на Тридентинска Венеција (Venezia Tridentina), Евганејска Венеција (Venezia Euganea) и Јулијанска Венеција (Venezia Giulia). Терминот Тривенето вообичаено се користи за означување на италијанските региони кои го сочинуваат регионот: Трентино Алто Адиџе, Венето и Фриули Венеција Џулија, со исклучок на териториите на Венеција Џулија кои денес се наоѓаат во Словенија и Хрватска.
Терминот Три Венеции се појавил за прв пат во средината на XIX век, кратко по втората војна за независност, и означувал три различни регионални ентитети, наречени „Венеција“: Венеција Проприа или Евганејска Венеција (сега Венето и Фриули), Тридентинска Венеција (Трентино Алто Адиџе) и Јулијанска Венеција (Горица, Трст и Истра).
Дефиницијата, измислена од географот од Горица, Грациадио Исаја Асколи, имала цел да го оправда италијанскиот експанзионизам кон Австро-Унгарската империја. Всушност, помеѓу 1914 и 1915 година, за да го убеди италијанското јавно мислење да се влезе во војна, пропагандата ја користела целта за ослободување на земјите во рацете на странската окупација, имено Тридентинската Венеција и Јулијанската Венеција (Евгејската Венеција веќе била припоена во 1866). На крајот на конфликтот, овие територии станале дел од Кралството Италија, но голем дел од Јулијанска Венеција ѝ бил отстапен на Југославија по поразот на Италија во Втората светска војна.
Тридентинската Венеција била така наречена од латинското име (Tridentum) на главниот град Тренто и била составена од провинциите Тренто и Болцано.
Евганејската Венеција, со своето име дадено од ридовите Евганеи, ги вклучувала провинциите Венеција, Падова, Ровиго, Верона, Виченца, Тревизо, Белуно и Удине.
Јулијанската Венеција била составена од четирите провинции Горица (Гориција), Трст (Триесте), Пула (Пола) и Истра (Фјуме).
