Легендарниот германски фудбалер Бастијан Швајнштајгер остро го критикуваше потегот на катарскиот шеик кој пред доделувањето на пехарот на светскиот шампион го покри капитенот Лионел Меси со црна наметка, која за момент збуни многу љубители на фудбалот.
По натпреварот следеше доделување медали и трофеи, а Меси го крена најважниот трофеј во светот на фудбалот. Но, тоа го направи на невиден начин. Организаторите го завиткаа Меси во црна наметка и тој со неа ја крена познатата „божица“.
Сцената привлече големо внимание и фановите се прашуваа за што се работи, а тоа е традиционална арапска наметка наречена бишт. Според арапската традиција, бишт обично се носи за престиж во посебни прилики како што се свадби, фестивали и муслимански празници.
Сепак, сè беше малку збунувачки, а Швајнштајгер смета дека на некој начин му бил расипан најголемиот момент во кариерата на кој многумина го сметаат за најдобар играч на сите времиња.
„Со тој потег владетелот на Катар му го одзеде најголемиот момент во кариерата на Меси. Очигледно тоа не му се допадна на Меси, а ни мене. Ако сакаа да ги почитуваат локалните обичаи, можеа да го направат тоа подоцна, во соблекувалната. Сè на сè, многу неуспешен перформанс“, рече Швајнштајгер.
