Скопје утринава се најде на трето место на листата најзагадени градови во светот, според мерењето на квалитетот на воздухот пред 12 часот.
Според објава на веб-страницата iqair.com, во Скопје се измерени 115,1 микрограми на кубен метар ПМ 2,5 честички.
Најголема загаденост измериле станиците во Лисиче, Гази Баба, кај Ректорат и во Центар.
Позагадени градови од Скопје утринава беа Њу Делхи, Индија и Лахор, Пакистан. Меѓу десетте најзагадени градови утринава се најдоа Сараево и Белград и тоа на четврто, односно на осмо место по загаденост на воздухот.
Ако ја погледнете листата сега, ќе забележите дека Скопје е на шестото место, означен е со црвена боја што значи дека воздухот е многу нездрав. Концентрацијата на ПМ 2,5 честичките во Скопје моментално се 24.9 пати поголеми од вредноста на препораката од СЗО.
