Портланд Трејл Блејзерс ноќеска го победи Бруклин Нетс со 105:103, но без првиот центар Деандре Ејтон, кој не можеше да стигне на натпреварот од многу необична причина.
Кошаркарот кој го наследи Босанецот Јусуф Нуркиќ на центарската позиција во Портланд не можел да излезе од својата куќа поради поларните услови кои моментално владеат во американската сојузна држава Орегон.
Ејтон не можел да излезе од куќата поради снегот и мразот, иако со часови се обидувал да го скрши мразот, па дури и вработените во Портланд дошле да му помогнат, но безуспешно.
На крајот останал дома не можејќи да стигне на време до „Мода Сентр“ арената во Портланд и неизвесниот натпревар го гледал на ТВ. Неговите соиграчи се мачеа против Нетс и во неизвесен натпревар победија со тесни 105:103. Во последната четвртина влегоа губејќи со 74:83, но направија пресврт добивајќи ја со 31:20.
Ејтон, кој сезонава бележи просечни 13 поени и 10 скока, го пропушти својот 12-ти натпревар оваа сезона. Претходните 11 ги пропушти поради проблем со коленото.