Поранешниот агент на ЦИА, Едвард Сноуден, изјави дека не планирал да остане во Русија. „Првично, не планирав да останам во Русија, но другите земји не можеа да ја осигураат мојата безбедност“.
„Во принцип, не планирав да останам во Русија, тоа беше само една станица на патот кон Латинска Америка, со оглед на тоа што Јужна Америка во минатото покажа отвореност кон свиркачите“, објасни тој.
Вели дека за време на неговиот 40-дневен престој во транзитната зона на аеродромот „Шереметјево“ пристапил до многу земји за да добие политички азил, но некои земји се плашеле од реакцијата на САД, а други не биле сигурни дали можат да ја обезбедат неговата безбедност.
„Немав избор и побарав азил во Русија, и го добив“, рече Сноуден.
Во јуни 2013 година Сноуден иницираше голем меѓународен скандал откако им предаде на The Washington Post и The Guardian тајни документи за програмите за следење на специјалните служби на САД и Обединетото Кралство на интернет. Потоа одлета за Хонгконг, а оттаму во Москва, каде извесно време беше во транзитната зона на аеродромот „Шереметјево“.
Откако во април 2020 година во Русија стапи на сила новиот закон со кој на странците во земјата им се дозволува да добијат руско државјанство без да мора да се откажат од претходното, Сноуден и сопругата Линдзи аплицираа за руско државјанство. На 26 септември 2022 година претседателот Владимир Путин му даде на Сноуден руско државјанство.
Сноуден и сопругата имаат два сина, двата родени во Русија.