Уникатните географски карактеристики на големиот кањон на долината Маринера беа снимени од орбитерот Mars Express на ЕСА.
Европската вселенска агенција (ЕСА) неодамна објави видео кое го прикажува целосниот опсег на долината Маринера, гигантски кањонски систем на површината на Марс кој се протега на над 4.000 километри.
Со ширина од 200 и длабочина до 7 километри, Маринера е еден од најголемите кањони во Сончевиот Систем, марсовски еквивалент на Големиот Кањон на Земјата, односно Кањонот Колорадо, во Аризона.
Снимката од летот дава спектакуларен поглед на делот од кањонот познат како Ноќен лавиринт (Noctis Labyrinthus), кој се протега на околу 1.200 километри.
Уникатниот систем на стрмни долини е опкружен со највисоките вулкани во Сончевиот Систем. Научниците веруваат дека токму тие, пред милијарди години, формирале огромни кањони, предизвикувајќи марсовата кора да се растегнува нагоре и на тој начин да формира пукнатини.
Денес, благодарение на прецизните мерења направени од сателитите кои орбитираат околу Црвената планета, можеме да ги видиме уникатните географски карактеристики на овој голем кањон во неверојатно 3D видео.
Видеото е создадено со комбинирање на детални стерео слики од кањонот, направени од орбитерот Mars Express на ЕСА, со постоечките топографски податоци за долината Маринера.
