Вчера на Волстрит берзанските индекси не забележаа значителни промени откако ФЕД очекувано ги зголеми трошоците за задолжување за уште четвртина процентен поен, на највисоко ниво од светската финансиска криза, т.е. во последните 22 години, а Dow Jones ја постигна најдолгата позитивна серија од 1987 година.
Њујоршкиот Dow Jones вчера порасна за 8,63 поени или 0,25 отсто, на 35.527 поени. Така, Dow вчера порасна 13-ти трговски ден по ред, постигнувајќи го најдолгиот период на раст од 1987 година.
Ако продолжи да расте денес, тоа ќе биде најдолгиот период на неговиот континуиран раст од далечната 1897 година, кога растеше 14 трговски дена по ред. Во последните 13 дена од растот, Dow Jones се зголеми за 5 проценти. Вчера, индексот S&P 500 стагнираше на 4.567 поени, додека индексот Nasdaq ослабе за 0,12 отсто, на 14.128 поени.
ФЕД вчера ја зголеми основната каматна стапка преку ноќ за 0,25 процентни поени, на опсег од 5,25-5,5 отсто, зголемувајќи ја 11 пати на изминатите 12 состаноци.
Претседателот на ФЕД, Џером Пауел, на прес-конференцијата по седницата изјави дека понатамошните одлуки за каматните стапки ќе се носат од состанок до состанок, внимателно следејќи ги макроекономските показатели, но исто така истакна дека е малку веројатно каматните стапки да се намалат до крајот на година.
После тоа, Goldman Sachs испрати белешка до клиентите во која наведуваат дека соопштението од ФЕД не е сигнал за забавување на темпото на зголемување на каматните стапки во иднина, туку дека банката очекува дека ФЕД нема да ги зголеми во септември.
„Пораката на Пауел беше јасна, Банката на федерални резерви ќе почека и ќе ги следи економските показатели пред да донесе какви било одлуки. Мислам дека ФЕД нема да запре додека не види намалување на инфлацијата на платите“, рече Брент Шут од Northwestern Mutual Wealth Management.
И откако најголемите технолошки имиња ги објавија своите резултати во вториот квартал, реакциите на пазарот беа различни. Цената на акцијата на Microsoft падна откако компанијата објави агресивен инвестициски план за да ја задоволи побарувачката за своите услуги базирани на вештачка интелигенција.
Акциите на Alphabet, во меѓувреме, пораснаа откако матичната компанија на Google ги надмина очекувањата на аналитичарите со заработка и стабилна побарувачка за услуги за компјутери во облак и враќање на приходите од реклами.
На европските берзи, при претпазливо тргување, лондонскиот FTSE индекс заврши во средата со загуба од 0,19 отсто, на 7.676 поени, додека франкфуртски DAX падна за 0,49 отсто, на 16.131 поен, а париски CAC за 1,35 отсто, на 7.315 поени.
