Српскиот тренер, кој ја предводи Сампдорија, е бесен што судиите му признаа гол на Јувентус иако играчот јасно играше со рака.
Сампдорија синоќа гостуваше во Торино и имаше 2:2 кога во 64. минута Адриен Рабјо погоди за 3:2. Но, голот следуваше откако Рабјо топката ја смири со рака.
Судиите во ВАР собата ја разгледуваа ситуацијата, но гледајќи ја снимката, иако од неколку агли, не можат јасно да оценат дали има доволно играње со рака за да го поништат голот. Така, главниот судија покажа на центарот.
„Видете, можете снимката и 20 пати да ја повторите, и секогаш може да видите дека тоа беше рака. Бицепсот се движи. Тоа е сѐ што ќе кажам. Ние имавме поништен гол на Маноло Габјадини против Емполи во 96. минута за рака кога тој паѓаше“, се жали Станковиќ говорејќи за DAZN.
„Ја видовме снимката на таблет и продолживме. Му верувам на судијата и на ВАР ако тоа е она што виделе, но ајде ве молам, можеме да прифатиме до одредена граница, потоа не ме правете будала“.
„Извинете, можеби секако ќе загубевме, но оставете ме да играм уште неколку минути со резултат 2:2? Моето срце крвари за овие момци, тие заслужуваат подобро“.
Јувентус имаше 2:0 со головите на Бремер во 11-тата и Рабјо во 26. минута, но потоа тимот на Станковиќ во фуриозни 70 секунди постигна два гола и дојде до израмнување. Погодија Томазо Ауџело и Филип Џуричиќ во 31. и 32. минута.
„Сампдорија даде сѐ од себе. Против силен тим како Јуве, кој со одземените бодови ќе беше на второто место, одигравме многу добро. Штетно е кога примате голови на евтин начин, но играчите одиграа одлично за да се вратат. Можеше да биде многу поинаку, но тие не се откажаа. Ако мора да загубам, сакам тоа да биде со гордост. Направивме многу грешки при третиот и четвртиот гол. Мора да поработиме на одбраната при нафрлени топки, да имаме храброст да им се спротивставиме на оние што скокаат во шестнаесетникот“, заврши Станковиќ.
Пет минути по контроверзниот гол Јуве имаше и пенал, но Душан Влаховиќ ја погоди стативата. Сепак, четвртиот гол за „Старата дама“ стигна во 4. минута од надополнувањето кога младиот Аргентинец Матиас Соуле го постигна својот деби гол во Серија А.
Станковиќ ја води Сампдорија од октомври, но на клубот од Џенова му оди тешко сезонава и со само 12 бодови е последен, а исто толку го делат од последното место кое гарантира опстанок.