Англискиот репрезентативец Рахим Стерлинг не учествуваше на синоќешниот натпревар од осминафиналето на Светското првенство против Сенегал поради вооружен грабеж што се случил во неговиот дом.
Крадците успеале да ги украдат сите вредни предмети, додека семејството на фудбалерот било во домот.
„Крадците понеле со себе сè што можеле. Украле сè што е вредно. Се чини дека сè било добро испланирано“, велат извори блиски до семејството на Стерлинг.
Селекторот на Англија, Герет Саутгејт беше прашан дали Стерлинг ќе се врати во Катар.
„Навистина не знам бидејќи во моментов тоа е ситуација во која мора да биде со своето семејство. Не сакам да го ставам под никаков притисок. Понекогаш фудбалот не е најважен и семејството мора да биде на прво место“, рече Саутгејт.
„Тоа е приватна работа, но никогаш не е лесно да се види некој од вашите соиграчи и пријатели како се справува со нешто вакво. Сигурен сум дека Рахим ќе разговара со менаџерот и ќе ја донесе најдобрата одлука за него и неговото семејство. Тоа е најважното. Му испраќаме најдобри желби и се надеваме дека ќе го видиме што е можно поскоро“, додаде капитенот на Англија, Хари Кејн.
Guardian пишува дека посветеноста на Стерлинг за Англија никогаш не била доведена во прашање, но фудбалерот бил премногу загрижен за децата па затоа е донесена одлуката да си замине во толку клучен момент за тимот.
