Лидерот на самопрогласената Народна Република Доњецк (ДПР) Денис Пушилин на својот Telegram објави дека Стивен Сигал пристигнал да го посети овој регион и дека планира да сними документарен филм кој „ќе го промени погледот на војната во Украина“.
Американскиот актер, сценарист и режисер Стивен Сигал го посети украинскиот сепаратистички регион Доњецк, што во вторникот го потврди и Пушилин.
„Стивен Сигал снима документарен филм за војната во Донбас. Денеска разговараше со воените затвореници во истражниот затвор Јеленовка“, рече Пушилин.
Тој истакна дека американски филмски режисер рекол дека 98 отсто од луѓето кои зборуваат за конфликтот во Донбас во медиумите никогаш не биле во тој регион.
„Тој сака да го смени погледот на оваа војна, тешка задача. Му посакувам успех и му благодарам што ја посети Републиката во овој многу неизвесен период“, заклучи Пушилин.
Руските режимски медиуми јавуваат дека Сигал пристигнал во Донбас како „специјален претставник на руското Министерство за надворешни работи за хуманитарни односи со САД“.
Да потсетиме, руската пропагандна машина се обидува да создаде лажна слика за настаните во Украина. Исто така, тие се обидуваат да ја оправдаат агресијата врз Украина.