Столтенберг вознемирен од наредбата на Путин

Генералниот секретар на НАТО Јенс Столтенберг изрази загриженост од одлуката на рускиот претседател Владимир Путин да ги стави во специјална готовност силите за одвраќање на земјата, јави ДПА.

Во интервју за BBC денеска Столтенберг кажа дека објавата на рускиот претседател покажува колку е „сериозен“ застојот околу руската инвазија на Украина.

Путин ја даде наредбата денеска во видео што го дистрибуираше Кремљ. Во него тој се осврна на „оружје за одвраќање“, но не го наведе експлицитно нуклеарното оружје. 

„Им наредувам на министерот за одбрана и на началникот на Генералштабот да ги стават силите за одвраќање на руската армија во борбена готовност“, рече Путин на средбата со воените лидери, која беше пренесувана и на телевизија.