Дека електричната мобилност станува скапа опција, покажуваат новите цени на полнење во Германија.
Електричните автомобили сѐ повеќе се присутни на патиштата ширум светот. Но, нивната предност во однос на возилата на бензин и дизел горива е дискутабилна, барем кога станува збор за реалните трошоци.
Компанијата Plugsurfing, која тврди дека има најголема мрежа на полначи за електрични автомобили во Германија, најави дека ќе ги зголеми цените на своите услуги од 15 јануари.
Така, во иднина, 1 kWh ќе чини 49 центи на нивните полначи со наизменична струја (AC), и 69 центи на брзите полначи со директна струја (DC).
На особено брзите полначи Ionity со моќност до 350 kW, тие во иднина ќе наплаќаат 1,09 евра за 1 kWh. Полнењето директно од Ionity е поевтино, па затоа електричната енергија се нуди за 79 центи за 1 kWh.
Досега Plugsurfing наплаќаше 44 центи на полнач за наизменична струја, 54 центи на DC полнач и 84 центи на полначите Ionity.
Plugsurfing го оправдува наглиот пораст на цените со зголемувањето на ДДВ-то и прилагодување на трошоците.
На мал електричен автомобил, како што е на пример Opel e-Corsa му требаат околу 16 kWh/100 км (фабрички податоци). Значи, тоа е во најевтина варијанта 8 евра за 100 километри возење, додека возењето Corsa со дизел мотор (4,0 л/100 км) чини помалку од 5 евра за 100 километри.
За полнење на најбрзиот полнач (возила кои поддржуваат брзо полнење), 100 километри ќе ги чинат германските возачи повеќе од 16 евра.
Секако, ако не патуваат далеку, Германците можат да ги полнат своите електрични автомобили дома, а во просек плаќаат околу 30 центи на киловат час за електрична енергија во домаќинството, па во тој случај трошоците на 100 километри со e-Corsa и Corsa е се слични.