Поранешниот соиграч го правда Лео Меси за слабите изданија во новиот клуб обвинувајќи го времето кое е постудено отколку во Барселона.
Луис Суарес откри дека Меси му рекол дека му е тешко да игра на ладното време во Франција. Што ли ќе беше доколку потпишеше за Манчестер Сити?
„Се слушаме секој ден. Одбегнуваме да зборуваме за нашите очекувања бидејќи сме играчи и знаеме како треба да се однесуваме во таквите моменти. Зборуваме за натпреварите и за семејни работи“, вели Уругваецот за TNT Sports.
Суарес со Меси играше заедно долги години во Барса, од 2014 до 2020.
„Ми рече дека кога игра на ладно му е многу тешко, особено на снег. Потребно е време за да се адаптира на времето таму“, додаде.
Можеби сега времето е изговор за слабите игри на Меси, но ладно - и особено снежно - не беше летово кога дојде во ПСЖ.
Меси имаше навистина бавен старт во новиот клуб. Прво, неговото деби мораше да се одложи поради пролонгираниот одмор поради настапот на Копа Америка каде Аргентина стана континентален шампион. Ги пропушти првите две кола во Лиг 1, а потоа играше, па ќе отсуствуваше поради повреда. Севкупно досега постигна само 4 гола и 3 асистенции од кои само 1 во француската лига, а асистенциите беа сите на еден натпревар (против Сент-Етјен).