Децата во Африка ќе бидат вакцинирани против маларија, ова претставува историски момент во борбата против оваа смртоносна болест.
Од маларија главно умираат бебиња и деца. Вакцината, произведена од GlaxoSmithKline, е едно од најголемите медицински достигнувања. Како ефикасна се покажа пред 6 години.
Сега, по успехот на пилот програмата за имунизација во Гана, Кенија и Малави, СЗО наведе дека вакцината треба да се применува. Тедрос Адхан Гебрејесус, генералниот директор на СЗО изјави дека ова е историски момент.
„Долгоочекуваната вакцина против маларија за деца и бебиња е огромен напредок во науката, заштита на здравјето на најмладите и контрола на болеста. Вакцината може да спаси десетици илјади животи секоја година“, изјави тој.
Маларијата се пренесува преку убод од комарец заразен со паразит кој ги напаѓа и уништува крвните зрнца за да се размножи. Лековите против паразитот во организмот, мрежите за кревет и инсектицидите малку помогнаа во намалувањето на маларијата.
Но, се уште постојат околу 230 милиони случаи на заболени и 400.000 смртни случаи годишно, а дури 95% од случаите се во Африка. Во 2019 година од оваа болест починаа повеќе од 260.000 деца.