Светската здравствена организација (СЗО) укажа на тоа дека целосно вакцинираните луѓе против коронавирус треба да продолжат со носење заштитни маски поради опасност од делта сојот.
Овој сој, за првпат детектиран во Индија, се шири низ светот и е многу позаразан од другите соеви.
„Луѓето не може да се чувствуваат безбедни само затоа што ги примиле двете дози на вакцина. И понатаму мора да се заштитуваат себеси. Самите вакцини не можат да го запрат пренесувањето на вирусот во општеството, поради тоа е потребно постојано носење маски, престој во проветрена просторија, водење сметка за хигиената на рацете, одржување физичка дистанца и избегнување гужви. Ова е уште поекстремно важно и кога сте вакцинирани“, изјави д-р Марианџела Симао од СЗО.
Ова предупредување следува во моментот кога одредени држави, меѓу кои и САД, немаат обврска за носење маски поради ублажување на мерките. На тоа се одлучија бидејќи вакцинацијата придонесе да се намали бројот на заразени и починати луѓе.
Според Wall Street Journal, во Израел скоро половина од целосно вакцинираните биле заразени од делта сојот. Поради тоа, земјата повторно ја врати обврската за носење заштитни маски во затворени простории и воведе други епидемиолошки мерки. Во оваа земја вакцинацијата се вршеше со вакцините на Pfizer/BioNTech.
Делта сојот е идентификуван во најмалку 92 земји низ светот.