Крег Тајли, првиот човек на австралискиот тенис и директор на Австралија Опен, се огласи околу контроверзиите поврзани со вакцинацијата и турнирот.
Тој потврди дека Новак Ѓоковиќ не добил медицинско ослободување од вакцинација против коронавирус и дека сите тенисери кои ќе учествуваат на првиот Грен слем сезонава ќе мора да се вакцинираат со две дози или една на вакцината Johnson & Johnson.
Најдобриот светски тенисер и деветкратен победник на Австралија Опен е на официјалниот список на играчи кои ќе учествуваат на турнирот, но тоа не значи дека ќе биде на теренот, објасни Тајли.
Никој не е на листата на исклучоци
„Никој нема да игра на Австралија Опен освен ако не е вакциниран со две дози вакцина или една доза Johnson & Johnson. Медицинско ослободување од вакцинација може да издадат само австралиските власти, а од утрово не е издадена ниту една“, рече Тајли и коментираше дека Ѓоковиќ, кој не потврдил дека е вакциниран, ниту дека ќе дојде во Австралија, е на списокот на играчи кои ќе учествуваат на турнирот.
„Сите се на тој список, но тоа не е гаранција дека некој ќе се најде на жрепката. Кој ќе игра ќе се знае по жрепката, а тоа ќе се случи за неколку недели“, објасни Тајли.
Австралија Опен ќе се игра од 17 до 30 јануари.