Американскиот производител на електрични автомобили Tesla соопшти дека ја затворил 2022 година со најголем профит откако е основан, и покрај високата инфлација, забавената економија и тешкотиите во снабдувањето.
Нето добивката на компанијата на Илон Маск се зголеми повеќе од двојно минатата година, скокна на 12,6 милијарди долари, според деловниот извештај објавен во средата по затворањето на берзата.
Вкупните приходи се зголемија за 51 отсто на 81,5 милијарди долари. Нето добивката во четвртиот квартал забележа речиси ист процентуален скок, достигнувајќи 3,7 милијарди долари, исто така највисоко ниво откако Мартин Еберхард и Марк Тарпенинг ја основаа компанијата во 2003 година.
Еберхард тогаш изјави дека сака да изгради „производител на автомобили кој исто така ќе биде технолошка компанија“, издвојувајќи ги „батериите, компјутерскиот софтвер и патентираниот мотор“ како клучни елементи.
Вкупните приходи се зголемени за 37 отсто во четвртиот квартал од минатата година, на 24,3 милијарди долари. Во 2023 година, Tesla сака да го прошири производството „што е можно поскоро“, за 50 отсто, потврдувајќи ги претходните планови, се вели во извештајот објавен вчера.
Неодамна ја намалија цената на возилото, па инвеститорите стравуваа дека побарувачката може да попушта. Стравувањата уследија по одлуката на Маск минатата година да го финансира преземањето на Twitter во вредност од 44 милијарди долари со продажба на блок акции на Tesla. Во таков амбиент, акциите на Tesla минатата година завршија во минус за 65 проценти.
