Американската пејачка Тина Тарнер официјално објави дека става крај на кариерата, а со публиката ќе се збогува со нов документарец посветен на нејзиниот живот.
На сцената е повеќе од 6 децении, а сега во осумдесет и втората година од животот, реши да се повлече и да се збогува со обожавателите, пишува New York Post. За HBO таа сними документарен филм во кој ја раскажува својата животна приказна. Всушност, тоа е последното обраќање на пејачката кон јавноста и збогување со обожавателите.
Во документарецот се присетува за нејзината младост исполнета со тага и болка, на љубовта и славата со која се стекна. Филмот открива дека страдала од посттрауматски стрес како последица од долгогодишното семејно насилство што го трпела додека била во брак со Ајк Тарнер.
„Трпев насилство, не постои поинаков начин да се раскаже оваа приказна. Тоа е реалноста, тоа е вистината. Тоа е она што го добиваш, така што мора да го прифатиш. Ова не е убав живот. Доброто не го надвладеа лошото“, заклучи Тина, која подоцна преживеа мозочен удар и канцер.
Филмот е направен од архивски снимки кои ја прикажуваат и мрачната страна од нејзиниот приватен живот.
Животот на Тина и претходно беше прикажан, првин во нејзината автобиографија од 1986 година „I, Tina“, а потоа и во биографскиот филм во 1993 година со Анџела Басет во главната улога.
Новиот документарец ќе биде прикажан на 27 март.
