Римската легенда Франческо Тоти откри дека поранешниот претседател на Милан, покојниот Силвио Берлускони, направил сѐ што може за да го донесе во редовите на „Росонерите“.
Светскиот шампион со Италија од 2006 година ја мина целата своја кариера на „Олимпико“ носејќи ги боите на Рома, а цело време одбиваше најразлични понуди. Секако, најпозната е понудата од Реал Мадрид, кој неколку пати ја одбиваше.
Но, Милан од ерата на Берлускони исто така го посакувал Тоти, а поранешната десетка тоа го откри за Sky Sport Italia.
„Беше многу смешна личност. Направи сѐ за да ме донесе во Милан, но по моите настапи за Рома беше тешко за мене да се разделам со мојот клуб“, рече Тоти.
Берлускони почина во Милано на 12 јуни. Погребот ќе биде в среда.
Тоти се пензионираше во 2017 година играјќи 786 натпревари за Рома на кои постигна 307 голови.
