Марина Машете ја освои титулата Мис на Португалија и стана првата трансродова жена што го направила тоа во оваа земја.
Машете е 28-годишна стјуардеса и првата трансродова жена која победила на изборот за Мис на Португалија, а ќе се натпреварува со уште една трансродова жена за титулата Мис Универзум во Ел Салвадор.
На овој начин, изборот за Мис Универзум 2023, кој ќе се одржи на 18 ноември во Сан Салвадор, ќе остане запишан во историјата како прв натпревар од ваков тип со најмалку две трансродови учеснички.
„Горда што сум првата трансродова жена која се натпреварува за титулата Мис Универзум Португалија. Не можев да учествувам со години, а денес сум горда што сум дел од оваа неверојатна група финалистки“, напиша Машете на социјалните мрежи неколку дена пред да победи.
Машете беше претставничка на градот Палмела, во Сетубал, од каде што е. Актуелната мисица се издвоила по заложбата за заштита на правата на животните, а како што пренесува португалскиот весник Público, освен што ја освоила круната, победила и во категоријата што го издвојува најсигурниот кандидат.
За Машете, нејзиното учество на натпреварот докажува дека „за среќа, особено во случајот со нејзиното семејство, љубовта е посилна од незнаењето“.
Во текот на летото, Рики Коле влезе во холандската историја со тоа што стана првата транс жена што ја освои титулата Мис на земјата. Прогласувајќи ја за победничка, жирито изјави дека 22-годишната девојка „има моќна приказна со јасна мисија“.