Судејќи по жалбите на корисниците од Косово, се чини како Twitter повеќе да не го признава Косово како независно.
Помеѓу жалбите кои деновиве кружат по Twitter платформата особено се забележливи оние кои тврдат дека Илон Маск го тргнал Косово како опција за држава и ја укинал поддршката за позивниот број +383, кој е токму за Косово.
„Грешка. Не можеме да праќаме текстуална порака на овој телефонски број бидејќи операторот не е поддржан. Twitter го отстранил Косово како држава или барем косовскиот префикс +383. Претходно можеше да го поставите Косово како држава со префиксот +383... но сега не може, на листата го нема Косово, ниту +383“, се пожали твитерџијата Арменд Красниќи.
Новинари од српскиот портал Mondo се обиделе да го проверат ова тврдење. Се обиделе да се регистрираат на платформата користејкќи телефонски број од кафуле во Приштина, на кој Twitter требал да прати код за верификација. На изненадување на новинарите, ја добиле истата порака како и горенаведениот твитерџија. Потоа се обиделе и со броеви од други оператори кои делуваат на Косово, но кај сите се појавила истата порака.
Од Mondo се посомневале дека можеби постои некој глобален проблем за регистрација, па тестирале дали ќе може да регистрираат профил со префиксот +381, кој е за Србија. Twitter успешно дозволил регистрација.
Иако Маск еднаш го спомена Косово кога се обидуваше на светот да му предложи решение за војната во Украина, ниту тој ниту самата платформа се немаат огласено околу одлуката на корисниците од Косово да им се забрани регистрација со телефонските броеви со косовски префикс, па останува нејасно дали станува збор за привремен проблем или трајна забрана.