Претседателот на УФЦ, Дејна Вајт, објави дека Хабиб Нурмагомедов официјално ја завршил својата ММА кариера, а потоа на социјалните мрежи се појави и Дагестанецот и ги потврди неговите зборови.
Хабиб се повлече од ММА натпреварувањата откако го победи Џастин Гејџи во октомври минатата година, затоа што ѝ вети на мајка си дека нема да се бори повеќе откако почина татко му Абдулманап, кој му беше и тренер, и менаџер.
Вајт оттогаш тврди дека станува збор за избрзана одлука и рече дека ќе разговара со Хабиб за можно враќање. Тоа го стори во неколку наврати, но легендарниот борач не се предомисли и на последниот состанок во Лас Вегас, тој само ја потврди одлуката.
„Официјално ја заврши кариерата. Беше неверојатно да те гледам. Ти благодарам за сè и уживај во она што е пред тебе, пријателе", напиша Вајт на Instagram.
По него се огласи и Хабиб.
„Дејна Вајт, фала ти, брате, и тебе, и на целиот УФЦ што ми дадовте шанса. Променивте многу животи поради овој спорт. Дејна, никогаш нема да го заборавам твојот однос кон мене, татко ми не го заборави тоа, и моите синови ќе се сеќаваат на тебе. Денес разговаравме како вистински мажи. Им благодарам на мојот комплетен тим, спаринг партнерите и навивачите. Се надевам дека ќе ја прифатите мојата одлука и ќе ја разберете“, рече Хабиб.
Хабиб е можеби најдоминантниот УФЦ борец на сите времиња со професионален рекорд 29-0 во својата ММА кариера и УФЦ рекорд 13-0.
