Руската олимпијка Камила Валиева излезе позитивна на допинг-тестирањето и тоа на лек за ангина и тврдеше дека ненамерно консумирала нешто контаминирано со лекот кој всушност го користел дедо ѝ.
Извршниот одбор на Интернационалниот олимписки комитет (ИОК) ја оправда својата одлука да ѝ дозволи на руската лизгачка камила Валиева да продолжи да се натпреварува велејќи дека нејзиното објаснување за тоа како забранетиот лек за ангина се нашол во нејзиниот систем изгледало мошне веродостојно.
Позитивниот допинг тест на Валиева, кој беше откриен откако таа му помогна на нејзиниот тим да го освои златото, деновиве доминираше во вестите за Олимписките игри во Пекинг. Денис Освалд, член на одборот кој ја предводи Дисциплинската комисија при ИОК, одговори на критиките за одлуката да ѝ се дозволи на 15-годишната девојка да продолжи со своето учество, велејќи дека нејзиниот случај нема никаква врска со наводите за државно организиран допинг, со кој Русија се соочи во 2014 година.
На руските спортисти им е забрането да се натпреваруваат под националното знаме поради тој скандал и се цел на зголемена контрола од страна на спортските власти и медиумите.
Одговарајќи на прашање за време на прес-конференција, Освалд ги потврди претходно објавените причини во руските медиуми, кои велеа дека Валиева и нејзиниот тим тврдат дека несакана контаминација веројатно го предизвикала позитивниот тест. Тие рекоа дека нејзиниот дедо примал терапија со триметазидин поради срцева болест.
Тестираниот примерок кој е центар на допинг контроверзијата бил земен од Валиева уште во декември за време на националното првенство на Русија. Потоа, лабораторија на ВАДА во Стокхолм го тестирала за забранети супстанци, но резултатите ги објави многу подоцна - дури минатата недела откако Валиева и нејзиниот тим освоија златен медал на Игрите. Поради таквиот развој на настаните во Русија се појавија сомнежи дека се манипулирало со тајмингот на објавување на резултатите за да се поткопа успехот на рускиот лизгачки тим во Пекинг.
Валиева беше дек од руската репрезентација која освои злато на 7 февруари по четиридневни натпревари. Таа беше најдобра во краткиот програм и во слободно лизгање за жени, а во тимот беа уште и Марк Кондратјук (краток програм и слободно лизгање за мажи), Анастасија Мишина и Александр Галјамов (парови) и Викторија Синицина и Никита Кацалапов (танцување на мраз).