Марко ван Бастен е незадоволен што неговиот сонародник потпиша за Јувентус бидејќи смета дека не може да се подобри поради слабиот квалитет на лигата.
Поранешната легенда на Милан и на холандската репрезентација упати низа критики кон Матајс де Лихт и Серија А, незадоволен поради тоа што младиот талент не се развива онака како што се очекуваше.
Користејќи го отсуството на Џорџо Кјелини кој се мачи со повреди сезонава, Де Лихт добиваше сѐ поголема минутажа во одбраната на Јувентус. Со добри игри се избори за место во почетните единаесет, јавноста во Италија е задоволна од него, но легенадрниот Марко ван Бастен е незадоволен.
„Не верувам дека се подобри ни малку од кога беше во Ајакс минатата сезона. Немаше среќа што не играше заедно со Кјелини, кој е вистински дефанзивец. Бонучи си тера по свое, не ја организира одбраната и не му кажува на Матајс што да прави. Кјелини, пак, работи и за другите“, вели Ван Бастен во интервју за Ziggo Sport.
По фантастичната сезона со Ајакс кога стигна до полуфиналето од Лигата на шампиони, Де Лихт минатото лето се пресели во Јуве за трансфер вреден 85,5 милиони евра. Во август ќе полни 21 година, а според Ван Бастен наместо да напредува, тој стагнира во својот развој во дефанзивната игра.
„Сигурен сум дека Де Лихт ќе научеше далеку повеќе во Реал Мадрид, Барселона или Манчестер Сити. Покеај тоа, ќе играше и во првенство кое е многу поинтересно бидејќи Серија А е на пониско ниво од лигите каде што играат клубовите кои ги напоменав“.
Како и да е, Де Лихт во својата прва сезона во Торино го освои Скудетото.