По трет пат во кариерата Луи ван Гал (69) ја предводи холандската репрезентација.
Ван Гал ја презеде Холандија откако Франк де Бур доби отказ поради испаѓањето во осминафиналето на Европското првенство.
Легендарниот Ван Гал започна со реми против Норвешка (1:1) и домашна победа над Црна Гора (4:0) во квалификациите за Мундијалот 2022 во Катар.
После вториот натпревар ги доби и првите критики. Имено, јавноста и медиумите негодуваат поради неговиот дефанзивен фудбал, нетипичен за репрезентацијата во портокалови дресови.
Новинар на ESPN се појави на прес-конференцијата на Ван Гал по натпреварот со Црна Гора и му предложи Холандија да игра дефанзивно согласно формацијата која ја користи, а која за новинарот е дефанзивна.
„Сакате да играте 5-3-2, како Челси? Тоа е дефанзивен фудбал“, рече новинарот.
Ван Хал остро му реплицираше.
„Немаш појма од фудбал. Ти си новинар кој сака да ја сподели својата визија, но ја немаш. Со 5-3-2 може многу добро да се напаѓа. Капа долу за Тухел бидејќи успева да го покаже тоа“, врати селекторот.
Ван Гал ги предводеше популарните „Оранје“ од 2000 до 2002 година и од 2012 до 2014 година. Под негово водство, Холанѓаните го освоија третото место на Светското првенство во Бразил во 2014 година, но првиот пат не успеаја да се пласираат на Мундијалот во 2002.
Познатиот холандски стручњак, исто така ги водеше Ајакс, Барселона, АЗ, Баерн и Манчестер Јунајтед во текот на кариерата, а во 2017 година објави дека се пензионира од „семејни причини“. Две години подоцна, официјално објави крај на тренерската кариера, но сега се врати да ѝ помогне на татковината.
Холандија пропушти да се квалификува на ЕУРО 2016 и Мунадијалот 2018.
