Фудбалскиот клуб Вардар најави дека од денеска се враќа на Националната арена „Тодор Проески“.
Со првата прозивка и тренинг денеска од 18 часот Вардар се враќа во својот дом, Националната арена „Тодор Проески“, или популарниот „Градски“.
„По долго време се враќаме во нашиот дом, и повторно како некогаш го враќаме сјајот на најголемиот и најсаканиот македонски фудбалски бренд. Вардар е клуб на народот, така било, така ќе биде секогаш, но овојпат тоа ќе биде и формално. Отворен клуб кој ќе функционира транспарентно, и ќе биде достапен за сите свои навивачи, јавноста и, се разбира, народот“, велат од клубот.
Вардар ги почнува подготовките за новата сезона, во која ќе игра во најдобрата македонска фудбалска лига, каде се врати по двегодишно патешествие во втората лига. Враќањето не беше лесно, а го избори дури по играњето бараж натпревар.
Најтрофејниот и најпознатиот македонски клуб не играше на Арената поради финансиските проблеми и скапата цена за изнајмување на најголемиот македонски стадион. Најчесто како домаќин играше на стадионот „Борис Трајковски“ во населбата Маџари.
Од клубот засега не откриваат како се надминале препреките за играње на „Градски“.
