Иако имаше 0:0 на полувреме, последнопласираниот тим во најдобрата македонска лига не успеа да го издржи притисокот и загуби со убедливи 4:0 од актуелниот шампион.
Денеска се одигра одложениот натпревар од 5. коло во 1.МФЛ помеѓу Струга и Вардар. натпреварот требаше да се игра на 27 август, но, како и неколку други, беше одложен поради настапите на Струга во европските купови.
Сега, цели два месеца по оригиналниот датум, Вардар издржа едно полувреме пред докажаниот голгетер Бесарт Ибраими да го скрши отпорот на скопскиот гигант во 56. минута. Потоа во 75-тата албанскиот интернационалец Ментор Мазрекај го дуплираше водството, во 84. минута Фламур Таири зголеми на 3:0, а во судиското надополнување за победата да биде убедлива се погрижи Сенад Јаровиќ.
Сега табелата во 1.МФЛ по 12 кола конечно е комплетна - сите клубови имаат одиграно ист број на натпревари. Вардар со поразот остана последен со 11 бодови, додека Струга остана трета, но сега со 24 бодови и само бод помалку од Шкупи и Шкендија кои го делат врвот.
Викендов следува ново коло, а Вардар ќе има нова тешка задача бидејќи гостува кај Шкупи, додека во дербито за врвот Струга дома ќе ја пречека Шкендија.
