Во Албанија во постојан раст е бројот на новозаразени лица со COVID-19, каде од почетокот на месецов во просек дневно има по околу 700 новозаразени, а вчера тој број изнесуваше 1.001, што е 45,2% од тестираните.
Националниот комитет на експерти за справување со пандемијата, потврди дека во земјата циркулира варијантата BA5.
– Во земјата циркулира варијантата BA5, за која немаме јасни податоци за формите, ниту за процентот на смртност. Имаме и малку податоци за преносливоста на оваа варијанта. Граѓаните да се вакцинираат. Секое лице кое поминало еден месец од прележувањето на заразата треба да се вакцинира, со која било вакцина. За ова нема дискусија, изјави една од најпознатите епидемиолози во Албанија, Силва Бино.
Во првите недели од јуни во Албанија имало намалување на хоспитализациите, кога на болнички третман биле само 4 пациенти, додека во јули зголемен е бројот на кои им е неопходен болнички третман, односно 5 до 6 дневно, при што најпогодени возрасни групи се оние над 60-годишна возраст.
Гостувајќи во емисија на News 24, Бино потсети дека може да се вакцинираат сите лица над 12-годишна возраст и оти од пред неколку дена се аплицира и четврта доза. Таа додаде дека во изминатите три месеци речиси воопшто немало интерес за вакцинација, што е многу погрешна перцепција.
Според Минстерството за здравство бројот на заразени со COVID-19 изнесува 5.644 лица, додека експертите предупредуваат дека нивниот број е најмалку двапати повисок.
