Во северозападниот дел на Англија е пронајдена опасна желка со вилици доволно силни за да прегризат коска.
Алигаторските желки потекнуваат од реките и мочуриштата на Флорида, а се препознаваат по нивниот оклоп, кој им дава изглед на диносаурус.
По неколку видувања на животното, слатководниот рептил бил фатен од локалната советничка Денис Чембрлејн, која ја ставила желката во корпа за пазарење и ја однела на ветеринар. Ветеринарот Дом Мул изјави за Sky News дека бил „навистина изненаден“ кога г-ѓа Чембрлејн ја донела желката.
Отпрвин помислил дека мистериозниот рептил можеби е морска желка карета.
„Ни најмалку не очекував дека тоа ќе биде алигаторска желка“, рече тој. Додаде дека животното најверојатно го фрлил сопственик кој кога го набавил не знаел колку е тешка грижата за ова за егзотично милениче.
Ветеринарниот персонал во моментот не можел да го каже полот на желката бидејќи е релативно мала, но тоа не ги спречило да ѝ дадат име.
„Желката колоквијално ја нарекувавме Флафи. Изгледа прилично слатко на чуден начин, па решивме да ѝ дадеме слатко име“, објасни ветеринарот.
Иако немаше недостиг од луѓе кои се нудеа да го посвојат Флафи, беше одлучено рептилот да биде преместен во специјализиран центар за диви животни во Корнвол. Алигаторските желки се инвазивен вид кој лесно може да касне низ коска и човечки прст, според енциклопедијата Britannica.
Алигаторските желки се ловци кои обично се хранат со риби, жаби, мали цицачи, па дури и други желки. Можат да пораснат до 100 см и да тежат до 90 кг.