Статистичкото истражување на CIES Football Observatory открива во кои лиги и клубови се кријат најдобрите изведувачи на ударите од белата точка во топ 5 лигите во светот, но и најлошите.
Бундеслига, Ла Лига, Лиг 1, Премиер лига и Серија А, тоа се петте најквалитетни фудбалски лиги во светот, сите од Стариот континент. Фудбалската опсерваторија при Меѓународниот центар за спортски истражувања (CIES) е независна групација формирана во 2005 година со седиште во Нешател, Швајцарија.
Нивното последно истражување опфати 35 европски лиги во последните три сезони (2017/18, 2018/19 и 2019/20), а ги истражуваше досудените пенали, односно бројот по лига и клуб, како и процентот на реализација.
Најдобри пеналџии има во Шпанија каде реализацијата е 79,2%, а најлоша во Франција со 74,5%.
Во просек најмногу пенали се судат во Италија каде на секои 249 минути судиите покажуваат на белата точка. Најтешко пенал паѓа во Англија, на секои 382 минути.
Најпрецизни пеналџии, пак, има во англискиот премиерлигаш Челси каде сите 12 досудени пенали биле реализирани. Стопроцентна реализација имаат и Маинц, Ајнтрахт и Барнли, но овие последните со само 4 досудени пенали.
Најмногу пенали во просек добивал Лацио, дури 31 на 102 натпревари, односно на секои 296 минути.
Со најлоши реализаторски способности се играчите на Њукасл со само 20% успешна реализација, односно само 1 од петте досудени пенали.
Најмалку пенали му судат на Барнли, по еден на секои 2.363 минути. Потоа следи Њукасл во 1.890, па Ајнтрахт со 1.103 минути.
Доколку ги земеме предвид сите 35 лиги врз кои е направено истражувањето, најуспешни пеналџии се во Хрватска со 81,9% успешност и за само 0,2% пред оние во Холандија.
По клубови, убедливо најдобар е лисабонски Спортинг на нашиот Стефан Ристовски. Од 28 досудени пенали, неговите соиграчи ги реализирале сите до последен. Многу клубови има со 100% реализација, но со статистика како Спортинг нема ни приближно.
