Требаше да се достигне рекордна височина од речиси 5.300 м за швајцарската метеоролошка служба да ја измери границата од нула Целзиусови степени, објави MeteoSuisse, додека во голем дел од земјата е прогласена тревога од топлотен бран.
„Радиостаницата Payerne, во североисточна Швајцарија, ноќта на 21 август 2023 година, измери изотерма од 0 Целзиусови степени на надморска височина од 5.298 метри, што е највисока од почетокот на мерењата во 1954 година“, објавија швајцарските синоптичари на социјалната мрежа Х (Twitter).
Претходниот рекорд беше измерен на 25 јули 2022 година на 5.184 м, додава MeteoSuisse.
Температурата се намалува со висината, а висината над која температурата се спушта под 0 степени варира во зависност од годишното време и метеоролошките услови.
„Таа изотерма од нула степени ги одвојува слоевите на воздухот со температури над 0 Целзиусови степени на пониски височини и оние со температури под нулата на повисоки надморски височини“, објаснува метеоролошката служба на својата веб-страница.
Поради големото влијание врз развојот на растенијата, врз границата на снегот и водниот циклус, оваа информација зазема исклучително место во метеоролошката прогноза и игра голема улога во секојдневниот живот на алпската област.
Швајцарија, како и добар дел од Европа, во моментов е под влијание на топлотен бран со температура која надминува 30 степени на надморска височина до 800 метри од петокот.
Топлотниот бран ќе трае до четврток, а се очекуваат температури и до 37 Целзиусови степени.