Германската автомобилска групација Volkswagen најави дека ќе инвестира 2,5 милијарди евра во проширување на производствениот и иновативен центар во кинескиот град Хефеи.
Центарот во Хефеи ќе ѝ помогне на компанијата да донесе технологии на кинескиот пазар за 30 отсто побрзо и да произведува целосно електрични возила, рече членот на управниот одбор на Volkswagen Group Кина, Ралф Брандштатер.
VW се подготвува да произведе во Кина два модела на брендот Volkswagen што ги развива во соработка со кинескиот партнер XPENG, соопштија од групацијата, додавајќи дека производството треба да започне во 2026 година.
На крајот на 2022 година, Volkswagen ја загуби „титулата“ на најпродаван бренд на автомобили во Кина, што ја понесе домашниот производител на електрични возила BYD.
Германската компанија најави голем број нови модели во електрификацијата на своето кинеско портфолио за да го врати изгубениот удел на најголемиот светски автомобилски пазар.