Објавен е официјалниот трејлер за четвртата сезона на мегапопуларната серија „The Crown“ и во него доминира Џилијан Андерсон во улогата на Маргарет Тачер.
Соочувањето на Андерсон со Оливија Колман ќе придонесе кон неодоливоста на кралската драма на Netflix.
По тизерот објавен пред две недели, во кој доминираше приказната за принцот Чарлс и принцезата Дијана, од официјалниот трејлер дознаваме дека четвртата сезона ќе има соочување на двете најмоќни жени во Обединетото Кралство во тоа време – „Челичната лејди“ Тачер и Кралицата Елизабета Втора (Колман).
Заплетот за четвртата сезона „The Crown“ почнува кон крајот на 70-тите години на минатиот век. Кралицата и нејзиното семејство се преокупирани со наоѓање невеста за принцот Чарлс (Џош О’Конор), кој сè уште не е оженет на 30-годишна возраст.
Во исто време, Велика Британија ја доби својата прва премиерка чиј однос со кралицата беше полн со тензии, особено за време на војната меѓу Велика Британија и Аргентина околу Фокландските Острови.
Првите три сезони на „The Crown“ се веќе достапни на стриминг платформата Netflix. Петтата сезона ќе ја има својата премиера во 2022 година. Веќе се знае дека австралиската актерка Елизабет Дебики ќе ја преземе улогата на Дијана, принцезата од Велс, во финалните две сезони на хит серијата на Netflix.
Четвртата сезона ќе има премиера на Netflix на 15 ноември.
